لاتنكحوا ما نكح آباءكم
كتبهاروح ، في 6 يناير 2010 الساعة: 23:23 مزمان لما كنا صغيرين إتربينا على حب الراجل اللى عمل لمصر مكانه فى فى وسط الدول العربيه والعالم أجمع، …..النهارده أولادنا بيتربوا على كره الراجل اللى نزل من مكانه مصر بين الدول العربيه والعالم أجمع!!!!!
أقوى دول العالم الرئيس فها مايقدرش يقعد أكتر من فترتيين رئاسييتين…… عندنا يقعد بمزاجه وإن كان عاجبكوا ياولاد …… واللى مش عاجبه يطلع بس راسه ويقول ،،،والويل والثبور وعواقب الأمور له وللى خلفوه لو كانوا موجودين وكمان للى هو خلفهم أو حتى قرايبه.
ولا بلاش ندخل من المدخل ده … خلينا ندخل من باب تانى
ماهو تعريف كلمه شاب عند الناس الكويسه(المقصود بيهم هنا ، الناس اللى بتقعد على كراسى متلغمطه بأقوى المواد اللاصقه) ؟ طبعا انا مضطر انى أجاوب على السؤال مع انى واحد من أولاد الطبقه الكادحه ويمكن كمان نقول عليها الطبقه الكحيتى أوى ( والله ده مش معناه انى حاقد أو حتى ناقم على اللى ربنا خلقنى عليه) …. الإجابه ياساده ياكرام ببساطه الشاب هو من يمر بمرحله عمريه مابين ال24 حتى الأربعين دا على حسب معلوماتى لإنه بعد كده المفروض انه يتقال عليه راجل ، يعنى دخل فى مرحله الرجوله اللى هى النضج بقى والعقل اللى بيركز كويس والمسئول عن قراراته ووووووووو.
طيب هو جيمى ( والله برضه أنا بحاول أخلق جو من الموده مابينى وبين الراجل الطيب ده بإنى بدلعه يعنى) عمره كام سنه دلوقت ؟؟؟؟؟؟؟ طب الكام سنه دول هل معناهم انه لسه ف مرحله الشباب ولا هو دخل مرحله الرجوله ؟ طب لو لسه ف مرحلة الشباب هل هو هيكون فعلا الشاب الصح اللى يحكم مصر؟
مش عارف ليه أنا ميال جدا ان( جيمى) يحكم مصر …………..وهاقولكم الأسباب وطبعا اللى عنده إعتراض يتقدم بيه وأقسم بالله انى مش هعمل زى أونكل حسنى ورجالته
جيمى إتولد وإتربى وإتعلم وعاش حياته كلها فى بيت رئاسى …. يعنى مش لسه هايتعلم (نحط تحت كلمة هايتعلم دى خطوط كتير). يعنى الإتيكيت، تزويق الكلام، الكدب ، بروتوكولات الرئاسه، الخطابه والإلقاء ، كيفيه التعامل مع الأمور الداخليه للبلد، وكمان الخارجيه، المحافظه على إبقاء السجون مليانه بالناس اللى بتعارض، وحاجات كتير كده.
جيمى إتولد و فى فمه ملعقه من ذهب ( يعنى الراجل مش محتاج والله انه يسرق ) اللهم إلا إذا كان لتأمين مستقبل أولاده……وده طبعا يخليه أفضل المرشحين
جيمى عنده شهادات كتير من دول كتيييييييييير أوى ، والشهادات دى كلها بتقول انه راجل مؤهل لتولى المنصب
جيمى عاصر زمن رجل الحرب والسلام (عمو أنور ) وكمان عاصر زمن (رجل كل حاجه… عشان مابقاش بحدد بس إنجازرات الراجل)، طبعا ده بيديله خبره قويه جدا.
وكتير من الأسباب الأخرى التى لايتسع المجال هنا لذكرها ولكن ممكن تدوروا فى الإنترنت على الحاجات الكتيييييييير جد اللى اتعملت فى الفتره الأخيره بس عشان تشرح الراجل ده ليه هو أفضل من غيره لتولى منصب رئاسه مصر،
السؤال هنا ياساده ياكرام (وفى جايزه كبيره للى يجاوب ….بس إتصل)
ليه العيله دى متمسكه ب مص ر
هل لإن مص ر حلوه؟
ولا لإنهم ماسمعوش بحكايه( ولا تنكحوا مانكح آباءكم)؟؟؟؟؟؟؟؟؟
أرجو ممن يجد فى نفسه القدره على الإجابه أن يفكر أولا فى حلاوة مص ر
تحياتى
روح
ليست هناك تعليقات:
إرسال تعليق