إفهم بقى …أنا ست

إفهم بقى …أنا ست


كتبهاروح ، في 24 أغسطس 2009 الساعة: 21:51 م

قالت : إنت ليه مش عاوز تفهم إنى ست؟
إنت ليه مش عاوز تقدر يعنى إيه ست بتحب؟
يعنى إيه انى أتخيل لمسه ايديك على ست غيرى؟
يعنى إيه انى اكون محرومه منك طول الوقت؟
يعنى إيه انى اتخيل وجودك فى مكان مقفول مع ست غيرى؟
يعنى إيه انك تبقى عايش معاها وجمبها وقدامها وأنا لأ؟
يعنى إيه أنك تبقى بعيد عن عينى؟ مش عارفه انت أكلت ولالأ؟ لبست إيه وانت نازل الصبح؟ هدومك مكويه ولا لأ؟ فطرت قبل ماتنزل ؟ أخدت علاجك؟
يعنى إيه البرد وأنا بعيد عنك ف ليل مالوش آخر ؟
يعنى إيه الحرمان من حضنك؟
يعنى إيه الحرمان من لهفتك عليا، الحرمان من انى اشوف نفسى ف عينيك، الحرمان من إنى أضمك فى حضنى ، أشيلك ف عينى ، أطبخلك ، أمشى معاك ف الشارع وإيدى ف إيديك،
يعنى ايه الوحده و الغربه فى وسط أهلى لإنك مش بينهم
يعنى إيه ما أشبعش منك حتى لو انت ف حضنى
يعنى ايه خوفى وقلقى كل لحظه عليك ، خوفى عليا فى غيابك ، خوفى منك وعليك
عاوز تعرف انا بموت كل يوم كام مره ؟
إسأل نفسك انت بتنزل الشارع كام مره ف اليوم ،وكام ست بتشوفك بعيون الست
بتتعامل مع كام ست ف اليوم ،
بتغير هدومك كام مره ف اليوم ومش انا اللى بناولك هدومك،
ولا أنا اللى غسلت الهدوم ،
ولا انا اللى كويت الهدوم،
بتاكل كام مره ف اليوم ومش انا اللى عملتلك الأكل ،
بتقعد كام ساعه ف البيت وانا مش قدامك ولا حواليك
بتكلم كام واحد أو واحده ف اليوم
بتفكر ف إيه غيرى كل يوم
بتبص على إيه غيرى كل يوم
يمكن لو عرفت كل ده هاتقدر تعرف انا بموت كام مره ف اليوم ، يمكن تقدر تعرف أحساسى انى مش جمبك
عارف شكل الدنيا إيه وانا جمبك ؟
عارف شكلى أنا إيه وأنا جمبك؟
عارف إحساسى أنا إيه وأنا جمبك ؟
عارف بيتنا بيبقى إيه وأنا جمبك؟
عارف بيبقى نفسى ف إيه وأنا جمبك؟
تفتكر بقى إن كل ده يكفيه مكالمه ف تليفون ولا رساله؟
تفتكر بقى كل ده يكفيه كام يوم تقضيهم ف حضنى؟
تفتكر بعد ده كله
أنا قادره أديلك حقك؟؟؟؟؟؟