فاكره

فاكره


كتبهاروح ، في 5 أغسطس 2009 الساعة: 23:30 مفاكره

لما كانت شوارعك أنضف من شوارع باريس

ومكانش لسه ليكى ريس

لما كانت مبانيكى أجمل من فيينا وروما

وبرضه مكانش ليكى ريس

لما كان ولادك لسه أسمائهم

النحاس، وسعد، وقاسم،وطه، و غالى ، والبارودى

مكانش فيهم ميمى ولا سوسو ولا حتى دودى

،،،،،،،،،،،،،،،،،،،،،،،،،،،،،،،،،،،،،،،،،،،،

فاكره لما كان العالم يعرف من العرب انتى

لما كانوا يقولوا ياعرب ،،، يبقى انتى

لما كان ولادك بيستقبلهم إخواتك بالزغاريد

لما ولادك راحوا علموا أجيال من ولاد إخواتك

النهارده ولادك آخر ناس تطلعلهم فيزا

ويمروا على كل الأجهزه الأمنيه

ولما يدخلوا يبقوا،،،فراش وكناس وحارس

،،،،،،،،،،،،،،،،،،،،،،،،،،،،،،،،،،،،،،،

فاكره

لما جه نجيب وقعد معاكى وقالك بحبك

وجه ناصر وقالك كل ولادك عندى واحد

وبعت ولادك يعلموا الناس

وجه أنور وقالك لازم ترفعى راسك

و-برضه- بعت ولادك

لكن عشان يسرقوا الناس

وجه  حسنى  وقال, وزاد, وعاد

و-برضه- بعت ولادك

لكن عشان يخدموا الناس

،،،،،،،،،،،،،،،،،،،،،،،،،،،،،،،،،،،،،،،





فاكره





ياترى انتى بجد فاكره ولا نسيتى

متهيألى نسيتى



ما إنتى قلبك أبيض وعبيطه





فاكره المنصه

فاكره خالد وعبود

فاكره الكرسى؟