العباره…..المعديه

العباره…..المعديه


كتبهاروح ، في 6 ديسمبر 2009 الساعة: 07:36 ص

تفتكروا ايه هو الفرق بين العباره والمعديه؟ انا هقولكم وجهه نظرى ، بس يارب تكون صحيحه
العباره بتجيب ناس من دول الخليج يعنى معاهم فلوس …… المعديه بتنقل ناس غلابه من شط لشط
العباره بتشيل ناس كتير ……… المعديه يادوب كام واحد
العباره عليها قبطان وطاقم ملاحه…….. المعديه يادوب طفل 15،16 سنه ممكن أوى يكون قبطانها
العباره بتاع ناس تقيله …….المعديه بتاع ناس غلابه برضه بيجروا على لقمه العيش
العباره بتجيب من الآخر وتحصد أرواح كتير …… المعديه يادوب كام واحد كده

يبقى كده وصلنا لنقطه مهمه ، العباره والمعديه الأتنين بيشتركوا فى مهمه واحده … قتل الناس ، وساعات نقل الناس .

نيجى بقى للمشكله واللى حصل وإيه سبب الكلام ده ، وإحنا افتكرنا المواضيع دى ليه دلوقت ….

الحادثه بتاع المعديه اللى بين كفر الشيخ والبحيره اللى حصلت النهارده ، ومن ساعات بس
بعد 3 ساعات من الحادثه مكانش لسه وصل لمكان الحادث أآ وسيله من وسائل الإنقاذ
بعد ساعتين من الحادث كان لسه معالى المحافظ فى الطريق
بعد 3 ساعات من الحادث مكانش لسه فى واحد طلع من الميه
بعد ……ساعه الناس بدأت تعيط على المفقودين
بعد ……ساعه الحكومه قالت أنها هتصرف تعويضات
بعد……ساعه طلع وفود المحاميين يجروا على أهالى الضحايا عشان ياخدوا منهم توكيلات عشان قضايا التعويضات
بعد…….ساعه إتفتح تحقيق فى الموضوع عشان يعرفوا ايه السبب ومين المتسبب ووووو
بعد…..ساعه الموضوع هيتقفل وكإن شيئا لم يكن

ف الآخر ……
.لسه فى ناس كتير لحمهم رخيص ومفروض يموتوا قبل ماحد يتحرك