تيجى نرقص

تيجى نرقص


كتبهاروح ، في 11 يونيو 2009 الساعة: 01:15 ص

تيجى نرقص؟

سؤال صغير أوى جواه كلام كتير اوى , والغريبه ان كل واحد بيقول السؤال بيبقى ليه معنى مختلف عن التانى ,

الأول : بيقولها كتيييييير من الحكام وزعماء دول العالم التالت والرابع والخامس ,,, لما يسمعوا تعليمات جديده من الراجل الكبير بتاع امريكا

التانى: فى اجتماعات مجالس إدارات الشركات ( وطبعا عرفنا هنا مين اللى بيسأل السؤال)

التالت والرابع والخامس …… والحبل على الجرار

لكن طبعا احنا مابناخدش بالنا من السؤال إلا لما نتفرج على فيلم والراجل(أى راجل) يقول للست(مش اى ست بقى) تيجى نرقص

انا طبعا مش عارف يوسف شاهين لما قالها كان يقصد بيها مين ( لأن الراجل متهم بإن افلامه مش مفهومه وعاوزه لوغاريتمات عشان تتفهم)

المهم بقى ومعلش عشان طولت عليكم , هارجع تانى للسؤال بتاع تيجى نرقص ده

وانا ليه عاوز ارقص ؟ وأرقص لمين ؟

انا بس كنت عاوز افضفض معاكوا شويه عن الدنيا واللى احنا بنعانيه فيها , كنت عاوز اسألكم ويمكن حد فيكم يقدر يجاوبنى
ممكن اقول ( تيجى نرقص ) لمراتى فى البيت عشان تخف شويه عليا من الطلبات اللى مابتخلصش , أو يمكن عشان تمسك ايديها شويه فى المصاريف, أو يمكن عشان ترحمنى شويه من أخبار صاحباتها, وأخبار النجوم, ووووووووووووو يعنى من الاخر من الرغى الكتير واللى مابيحلاش الا وانا هبدأ افكر اقعد مع نفسى شويه عشان ارتاح من مشاكل الشغل اللى مابتنتهيش.
ممكن أقول ( تيجى نرقص) للمدير بتاعى اللى مش عاوز يبطل طلبات ولا حتى عاوز يبطل يستعمل كل اساليب الضغط اللى نعرفها واللى مانعرفهاش ( واللى انا مش عارف هو عرفها منين) وكمان عشان يعنى ياخد باله منى شويه فى أى حاجه كده جايه من على السكه ( ترقيه, علاوه, كده يعنى)
ممكن أقول(تيجى نرقص) لأصحابى , اللى مابيصدقوا اننا نتقابل عشان كل واحد يبدأ فى فتح ملف المشاكل اللى بتقابله وكمان بتقابل اصحابه اللى احنا مانعرفهمش .

ياااااااااااه دا انا اكتشفت حاجه مهمه أوى

انا ما أختلفش كتير عن الناس اللى بتقول السؤال ده

( طبعا أنا ما أقصدش الزعماء العرب لأن المقامات محفوظه)