أوباما أخد البدل من شركه غزل المحله ولا لأ؟
كتبهاروح ، في 9 يونيو 2009 الساعة: 15:18 م
نبدأ كلامنا بالصلاه على النبى كده عشان القعده تبقى على كل المستويات ( طبعا كل من له نبى يصلى عليه)
بيقولوا الأخ أوباما كان ف مصر , وقالوا كمان انه هايعمل المعجزات اللى محدش عملها قبل كده,
وقالوا كمان انه جاى وجايب معاه الخير كله,
وقالوا كمان انه جاى يصالح الدنيا كلها على بعضها,
وقالوا انه هايقول كلام كبير أوى , الكلام ده هايوفق مش بس راسين ف الحلال ,,, دا هايوفق كل الرؤوس مع بعضها
والغريبه بقى ايه
- الراجل فى الأول راح السعوديه عشان ياخد الإذن من هناك انه يتكلم مع المسلمين(والناس مشكورين صرحوله)
-إعلام العالم كله كان مستنى الراجل الطيب ده هايقول ايه
-التليفزيون المصرى قعد ياعينى شاغل القناه الرسميه بتاعته طول النهار والمذيع ياعينى عليه معدش لاقى كلام يقوله للناس آل ايه بيمهدوا للخطاب بتاع اوباما
ماشى وقعدنا نستنى وأخيرا البج بوس اتكلم !!!!!!!!!!!!!!!!!!!!!!!!!!!
طبعا ماتسألونيش هوقال ايه ,, كلكوا عارفين اللى قاله ,,,, واللى خيب آمال كل الناس
الراجل ماقالش كلمتين على بعض ممكن يتحولوا لأى حاجه على أرض الواقع
الراجل طلع انه عنده واحد كويس أوى بيكتبله الخطب بتاعته
الخطب اللى زى اللى قالها عندنا ف مصر
مين بقى عمل تحاليل للكلام اللى قاله الراجل الطيب
مين دخل الكلام ده المعامل (معامل تحاليل الكلام)عشان يشوف نتيجه التحاليل دى ايه
القنوات الفضائيه (اللى هى على القلب زى الهم) محدش فيها عمل الواجب مع الراجل
زمان كان أى رئيس لما يقول كلمتين …… تفضل الماكينه الإعلاميه ماسكه الكلام ده وتشرح وتطول فى الشرح فى كلام الريس!!!!!!!!!!!!!!!! طب ده الريس الكبير أوى , اللى مشغل كل الناس عنده
يعنى مفروض يتعمل الواجب الكبير أوى معاه ………….
طيب ياسيدى أديك قلت الكلمتين اللى تاعبينك عشان توفق بين الناس
لكن ياترى الحرب على الارهاب خلصت؟
سبتوا العراق؟
قفلتوا السوق السودا بتاع السلاح اللى انتوا فاتحينها على الآخرفى ……………………………….. ؟
( كل نقطه تمثل عدد من الدول)
حليتوا مشاكل لبنان وسوريا؟
إسرائيل طلعت من فلسطين؟
أهل غزه دلوقتى بيلاقوا حاجه ياكلوها؟
وقفتوا قتل الفلسطينيين؟
جبتوا أكل للشعب المصرى؟
رجعتوا طالبان لأفغانستان تانى بعد ما نقلت الاحتلال لباكستان؟
وقفتوا الحرب ف اليمن؟
وقفتوا القتل الطائفى فى العراق؟
كمان ولا كفايه يارجاله؟ انا عارف والله انه كله كلام ف كلام ,
المهم بقى والسؤال المهم جدا واللى انا عاوز أى حد يجاوبنى عليه
أوباما أخد البدل( هديه يعنى) من شركه غزل المحله ولا لأ؟؟؟؟؟؟؟؟؟؟؟؟؟؟؟؟؟؟؟؟؟؟؟
ليست هناك تعليقات:
إرسال تعليق