حريه التعبير……… ديمور طاقيه
كتبهاروح ، في 3 يوليو 2009 الساعة: 15:16 مكتبت لى إحدى الأخوات ردا على موضوع كنت قد كتبته تحليلا لكلمات الراجل الطيب جمال بخيت (مش باقى منى)
الأخت قالت انى قلت اللى الناس عاوزه تقوله, انا والله لفت انتباهى جدا الكلمه دى , وراجعت نفسى وراجعت الايام والتاريخ اللى محفور فى ذاكرتنا كلنا, حاولت اشوف هل فعلا احنا بقى عندنا حاجه اسمها حريه التعبير؟؟؟؟؟؟ طب ماتيجوا نحاول كده نحلل حكايه حريه التعبير دى ليه؟
زمان لما كان الناس شويه صغننين( يعنى كام مليون بس) كان ممنوع الكلام عشان كان فى عساكر بتقطع كل لسان يتكلم(بوليس سياسى وكده يعنى) وكان فى اماكن تترمى فيها جتت الناس اللى بتتكلم,وكمان كان فى خير كتير عشان يصرفوا علىالمساجين ويأكلوهم والأهم من ده كله كان فى جبال فى مصر لسه ممكن تتكسر والمساجين يشتغلوا فيها الاشغال الشاقه (ماهو كان سعرهم أقل من سعر ديناميت التفجير) لكن دلوقتى( انا طبعا ما أقصدش فى الوقت الحالى لكن اقصد من أول تاريخ مابدأنا نحس اننا بقى عندنا حريه كلام وحريه تعبير وديمورطاقيه)………. نسبه العساكر بالمقارنه بنسبه الناس بقت مش كفايه ومفيش فلوس فايضه عشان يصرفوها على السجون عشان يأكلوا الناس!!!!! قاموا عملوا ايه؟؟؟؟؟؟؟؟
قالوا هانديكم حريه الكلام !!!!!!!!!!!!!!!!!!!!! ياحلاوه ياولاد … هانتكلم ,,,, بقى عندنا حريه كلام زى الناس الكويسه,,, بقى عندنا صحف معارضه بتصدر فى النور (يعنى مش منشورات سياسيه وبطولات فى طبعها وتوزيعها!!!!!!!!!), بقينا بنقدر نتكلم من غير مانخاف من اللى قاعد جمبنا على القهوه لا يكون من الجماعه إياهم اللى مايتسموا (المرشدين يعنى) طبعا كلمه المخبرين راحت عليها ….. ماهو أصل المخبر بقى معروف وشكله محفوظ لكل أهل الحته وكمان بقى فى مصالح مشتركه مابين المخبرين والأهالى !!!! هاتقولولى ازاى ؟ هاقولكم ببساطه اوى كل الظابط ماياخد عيل صغير يقوم اهله يجروا على أى حد يعرف المخبر وطبعا هاياخد اللى فيه النصيب عشان يروح للظابط ويشهد إن الواد فلان ده غلبان ومالوش فى اى حاجه يابيه وأنا عارفه كل واحد عاوز يزور اى حد يعرفه مسجون لازم طبعا يشخشخ جيبه باللى فيه النصيب للمخبر عشان يدخل وبرضه اللى عاوز يدخل كام برشامه على كام إزازه دوا للناس اللى جوه معلش انا طولت عليكم فى حكايه المخبرين دى لكن دى فئه منسيه تماما من الاعلام والصحافه ووسائل النشر وماكينات الدعايه الإعلاميه كلها. المهم بقى الحكومات عملت ايه بقى لما لقت ان إمبراطوريه المخبرين مابقتش تنفع للتجسس على الناس الطيبين اللى بس عاوزين يتكلموا؟ قاموا عملوا المرشدين .. اللى هما بيشتغلو من تحت لتحت من غير م حد يعرفهم يااااااه دا احنا نسينا الموضوع الاساسى ودخلنا فى كلام تانى خالص …. يالا بقى معلش هانرجع لكلامنا من تانى المهم بقى ان الدوله لما لقت ان الظروف مش فى صالحها من جميع الجهات ,,,,طبعا مش عاوزين ننسى الضغوط الخارجيه من جماعات حقوق الانسان والفضاح اللى عملوها للبلد (دا على اساس إن الحكومه عندها دم واتكسفت على دمها وسمحت بحريه التعبير بناء على الفضايح اللى عملتها حقوق الانسان ….. مش عشان القوى العظمى مسكت الحجه دى وعملت منها ورقه تضغط بيها على الحكومه فى وقف أو إستمرار المعونات الانسانيه والغير إنسانيه - اللى هى أصلا واخدينها من فوائد فلوس العرب المودعه عندهم - مش عاوزين بقى ندخل فى حكايه فلوس العرب دى ونغلط فى الناس ونقول ان الفلوس دى الأغلب منها حسابات سريه وواخدينها من دم الشعوب ………………….المهم بقى ان الحكومه سمحت بحريه التعبير
بس ماتفرحوش أوى كده .ماهى حريه تعبير مع مراقبه كل وسائل التعبير ….. مع وجود مدرعات فى الشوارع لحمايه المظاهرات مع وجود آلاف الموظفين على آلاف الأجهزه لمراقبه الإنترنت وكل اللى بيتكتب فيه مع وجود أصدقاء فى صحف المعارضه (بس عشان مايسيبوش الصحفيين يتهوروا فى الكلام) مع وجود سلاح على خصر عيل ابن كام وعشرين سنه ومتعين أمين شرطه مع وجود قانون بيسمح لأى مخبر أنه يقتحم بيتك فى أى وقت وأى لحظه ( حتى لو كنت بتغير مكان الدولاب اللى فى أوضه النوم , برضه من حقه انه يدخل عشان يتأكد انك مابتعملش حاجه تضرك!!!!!!!!!)
واحنا فرحنا اووووووووى واتكلمنا وهانفضل نتكلم
والغريبه احنا وصلتلنا الهبه والمنحه والمكرمه بتاع حريه الكلام على انها انتصار اخدناه من فم الاسد !!!!!!!! مش قادرين نفهم انه مفيش حاجه اسمها حريه تعبير…. مفيش حاجه اسمها تتكلم من غير ماتتحاسب……… مفيش حاجه اسمها تاخد من الحكومه شيء هى مش عاوز تديهولك مفيش حاجه اسمها انك انتصرت على الحكومه مفيش حاجه اسمها انك تهزم الحكومه
لكن
فى ناس كتيرماتت فى السجون عشان فاكره انها ممكن تقدر تعمل ده فى ناس كتير قضت سنين من عمرها فى السجون برضه عشان فاكره انها تقر تعمل ده فى ناس كتير مخها راح ومابقتش تعرف راسها من رجلها عشان فاكره انها تقدر تعمل ده فى ناس كتير اتحرمت من أولادها وإتحرمت من أهلها عشان فاكره انها تقدر تعمل ده لا أنا ولا أى حد يقدر ينكر مجهودات وتضحيات الناس دى
بصراحه …. انا مش عارف اختم الموضوع ….. مش لاقى كلام ممكن يرفع من روحنا المعنويه…… ولا حتى لاقى كلام ممكن يكسر روحنا المعنويه ويخليها فى الحضيض!!!!!!!!!!!!!!!!!!
ليست هناك تعليقات:
إرسال تعليق