سيدى الرئيس… مَن علَمك الخوف؟
كتبهاروح ، في 31 ديسمبر 2010 الساعة: 07:01 ص
سيدى الرئيس
انا رجل من ملايين الرجال الكاظمين غيظهم مما يعانون فى حياتهم اليوميه
انا رجل من الملايين القابعين تحت قيادتكم لسنوات طويله
انا رجل ممن أكلت -حتى التخمه- وشربت -حتى الثماله-
على كتفه الأيام تحت رايتكم
سيدى الرئيس
أتمنى أن تصلك كلماتى وتجيبنى على الآتى
مين علمك تخاف ياريس ؟
ف 73 مخفتش ياريس وعملت ضربه جويه عظيمه
وف 81 مخفتش ياريس وعملت ضربه أرضيه أعظم
طب جرالك إيه بعد كده ياريس ؟
مش شايف البلد بقت عامله إزاى ياريس
مش شايف الناس بقت عامله إزاى ياريس
مش شايف ولاد البلد وصلوا لفين ياريس
مش شايف حرامية البلد بقوا فين ياريس
طب مش شايف ولادك بقوا فين ياريس؟؟؟؟؟؟؟؟
أيوه ياريس
لو مش شايف 80 مليون مصرى
على الأقل شوف 2 منهم بس (مش 2 مليون لا )
على الأقل شوف علاء وجمال
شوف الخير اللى بقوا فيه ياريس
وإسأل نفسك
طب الخير ده جالهم منين ؟
وكان بتاع مين ؟
وأخدوه من إيد مين ؟
ومين اللى إتحرم عشان ولادك يسهروا سهره حلوه
ومين اللى إتقتل عشان قال لواحد فيهم لأ
طب بلاش علاء وجمال
هات الساده الوزراء وحاسبهم
إسألهم :كل واحد فيهم دخل الوزاره ومعاه كام …. وبقى معاه كام ؟
إسألهم كل واحد فيهم بيتغدى إيه وبيتعشى إيه ……. وبلاش الفطار
وإسألهم الناس بتاكل إيه وبتتغدى ولا لأ…. وبرضه بلاش تسأل عن الفطار
إسأل وزير الصحه : بيتعالج فين … فى مستشفى حكومى ولا قطاع خاص
إسأل وزير…. ووزير…. ووزير…..
ولا أقولك ……….بلاش تسأل ياريس
إنزل إمشى فى الشارع يوم واحد
شوف الناس ياريس
تصدق بالله : هتشوف اللى عمرك ماشفته ولا حتى فى روتانا
أيوه ياريس …روتانا بتاع وليد ابن طلال …. عارف طلال ياريس ؟؟؟؟؟؟
ماتنزل بقى ياريس
تعالى
مره واحده الله يخليك
إنزل الشارع هاتلاقينا ميتين
إنزل الشارع هاتلاقينا غارقانين
إنزل الشارع هاتلاقينا بنقتل بعض عشان اللقمه
إنزل الشارع هاتلاقينا بندبح ولادنا
إنزل الشارع هاتلاقى مُزز كده
عارف المزز دى تبقى مين ياريس ؟؟؟؟؟؟؟؟؟؟؟؟؟؟؟
إنزل ياريس وشوف
إنزل يمكن لو نزلت متعرفش تطلع تانى
إنزل يمكن لو نزلت ترجعلك شجاعتك بتاع زمان
إنزل وشوف الموت على الطريق
إنزل وشوف البلد ياراجل دى بتسأل عليك
تصدق بالله ياريس
البلد بتسأل عليك
باعتالك السلام وبتقولك إنت غايب من سنين طويله ليه؟
طمنا على أخبارك
وياهلترى إنت بتسأل على أخبارها ؟
حتى ولو من بعيد لبعيد؟
وبتقولك كمان
إنها كان عندها ولد
إتولد ف 73
وإتفطم ف 81
وسامحها بقى
متعرفش عنه حاجه من 81
ليست هناك تعليقات:
إرسال تعليق