تخاريف

ــــــــــــاريف

كتبهاروح ، في 18 يناير 2012 الساعة: 04:28 ص

زمان …وأنا صغير , كان نفسى أبقى طيار , وظابط شرطه, وزعيم عصابه(بس معملش حاجه حرام).

زمان كان نفسى أتجوز دكنوره, أو مدرسه .

زمان كنت بدور على حنان الأب فى أى راجل كبير ف السن .

زمان كان الكلام ممنوع , والكتابه ممنوعه, والرأى ممنوع 

ــــــــــــــــــــــــــــــــــــــــــــــــ

حينما أعود …ستحملين معى كل ماتبقى لى من أيام

ونهرب سويا إلى حيث اللا حلم

حينما أعود …لن افرح بلقياكِ

ولكنى

سأملك بين يدىَ كل الدنيا

انتِ

ـــــــــــــــــــــــــــــــــــــــــــ

فى اليوم اللى مات فيه أبويا , منعونى من حضور الدفن

مع ان كل أحلامى أندفنت معاه 

ــــــــــــــــــــــــــــــــــــــــــ

قالت لى (عزه) : لا تهرب

وقالت : بحبك

وقالت: أنت رجلى

وقالت:شاركنى أيامك

وأنا………..

هربت بكل ما أوتيت من قوه

وبعد ربع قرن

عدت

أسأل عنها 

بالزمه مش أنا عبيط؟؟؟؟؟؟؟؟؟؟؟؟؟؟

ـــــــــــــــــــــــــــــــــــــــــــــــــ

نبوخذ نصر ….. عمل أعظم حضاره على أرض العراق ,

صدام حسين …. عمل أكبر مقبره تحت أرض العراق

الحجاج بن يوسف الثقفى ……. كان قاتل

على بك الكبير ………….كان راجل وحش 

ـــــــــــــــــــــــــــــــــــــــــــــــــــــــ

قالولنا زمان إن الملك فاروق كان راجل وحش

وإن اللى قبله برضه كان راجل وحش

واللى جه بعده برضه كان راجل وحش

واللى بعد اللى بعده كان راجل وحش

كل الوحاشه كانت بتتقال فى الكتب الخارجيه

لكن كتب المدارس ……..كان كل الزعماء عظماااااااااااااااااء

ــــــــــــــــــــــــــــــــــــــــــــــــــــــــــ

يوما سيكتبون عنى فى الجريده

أنى كنت أسوأ الناس

وسيقرأ أولادى فى كتبهم المدرسيه

أنى كنت أعظم الزعماء

ــــــــــــــــــــــــــــــــــــــــــــــــــــــــ

لا تقتلينى يا إمرأه

فأنا لم أبخل عليكِ

بأيام عمرى