كتبهاروح ، في 10 يونيو 2009 الساعة: 23:57 م
كمان مره الراجل جاى
تفتكروا لو احنا عملنا اللى مايتعمل عشان نغير ان الراجل جاى هل فى حد ممكن يسمع الكلام ؟ واللى هايسمع هايساعد؟ واللى هايساعد….ياترى هايساعد ازاى ؟
طب لو ساعد بطريقه احنا مش عاوزينها ؟
طب لو ساعد زى ماهو عاوز؟
طب لوساعد عشان احنا اللى نساعد؟؟؟؟ جديده دى وعاوزه شرح صح؟
انا هاقولكم
هو هايساعد ويبان قدامنا انه بيساعد لكن فى النهايه هو مش عاوز يساعد , هو عاوز احنا اللى نساعد عشان يوصل فى النهايه للى هو عاوزه
ماهى سياسه بقى ……
تعروفوا ياجماعه احنا ايه المطلوب مننا ؟ طب بلاش دى
تعرفوا احنا ايه اللى طالبينه؟ طب بلاش دى كمان
طب تعرفوا ايه اللى ليكم وايه اللى عليكم ؟
طب ماتيجوا كده نحاول نعرف احنا ايه اللى لينا وايه اللى علينا
لينا ايه؟
أكل وشرب وسكن وتعليم, وجواز, وأطفال , وبالمره بقى عربيه , ومكان نصيف نغيش فيه , وشويه فلوس فايضه كده .. يعنى لزوم الفشخره الكدابه
تفتكروا هى دى طلباتكم كلكم ؟
طب هى دى طلبات الجزء الاكبر منكم؟
طب دى طلبات نسبه كام من كام فيكم ؟
لاحظوا بقى …….. هنبدأ نختلف
انا عاوز حاجه يمكن يعوزها 20% من الناس , وغيرى عاوز حاجه تانيه برضه عاوزها 20% من الناس
ووووووووووووو
واللى انا عاوزه غيرى مش عاوزه ولو عممنا اللى انا عاوزه غيرى هايقوم يقول انى انا ظالم وطاغيه وطاغوت ومش عارف ايه كمان
يبقى احنا هنا بندور علي ايه بالظبط
عاوزين إشتراكيه ولا رأسماليه ؟
عاوزين لجان شعبيه تحكم ولا جمهوريه
عاوزين ملك ولا رئيس؟
عاوزين نمشى امورنا بنفسنا ولا نجيب حد هو اللى يمشيها؟
عاوزين نبيع البلد وناخد فلوس نصرفها عند اللى هايشتروا البلد
عاوزين نشتغل احنا بإيدينا ونبنيها ( دا على اساس ان البلد لسه فيها خرم ابره ممكن يتبنى) طبعا غير الصحرا
طب عاوزين ناكل ونشرب وننام ونجيب خدامين وعمال من بره يشتغلوا عندنا ؟
طب لو عملنا كده مش تفتكروا اننا هايبقى عندنا وقت فراغ كبيييييير اوى
وعلى رأى واحد قالها كلمه من زمااااااان اوى
العربى لو اكل وشرب وشبع يبدأ يدور على خناقه !!!!!!!!!!!!! انا طبعا معرفش هو مين ولا موافق على كلامه
طب نرجع لكلامنا بقى
احنا عاوزين ايه ؟
انا افتكر ( ودا رأى شخصى والله) اننا عاوزين بس لقمه وهدمه ونومه وشغلانه نعمل منها كل ده.
دا رأى شخصى ومش فرض على حد وهايطلع كتيييييير اوى من الناس اللى مش هايعجبها الكلام ده
كتير اوى هايقولوا انهم عندهم احلام اكبر من كده بكتير
عاوزين اكتر من كده بكتير
عاوزين يسكنوا فى مكان محترم , ويركبوا عربيات آخر موديل , ويلبسوا اشيك حاجه, ويسهروا فى افخم مكان, وكده يعنى
انا طبعا مش بتهم الناس دى بأى نوع من الاتهامات …….. هما كده
الدنيا كده , فيها اللى غاوى يعيش على قده , واللى غاوى فشخره, واللى راضى بالقليل , واللى مش راضى خالص حتى لو جبناله لبن العصفور
هانتعب نفسنا بقى مع ده وده ونحاول نفهم نفسيات الناس كلها واحد واحد
لا , طب نعمل حاجه تانيه
نجيب ناس بتفهم فى نفسيات الناس عشان تعرف كل واحد من الناس عاوز ايه
حلو الكلام والله
يعنى احنا كده عاوزين حد يفهمنا نفسنا الاول
والحد ده بعد مايفهمنا نفسنا يقوم يعمل ايه , يعرف بقى كل واحد فينا عاوز ايه
يعنى بالعربى كده احنا عاوزين حد يساعدنا الاول عشان نعرف احنا عاوزين ايه
هو بالحق ياجماعه
هو انا كده دمى تقيل فى الكلام ولا انتو فاهمين انا عاوز اقول ايه
هو انا طولت عليكم ولا انا كده بختصر فى الكلام
قو انا رغاى وبحب الرغى الكتير ؟ ولا انا معذور فى الكلام ده
يمكن كل واحد فيكم عاوز يقول كلمه فى الوقت ده
ويمكن مفيش فيكم حد عاوز حتى يعبرنى ويقوللى انى غلطان
ويمكن كمان انتو شايفين ان اللى انا بقوله كلام متكرر كتير اوى
ويمكن كمان يكون جديد على حد وقديم على حد تانى
ويمكن كمان اكون انا اللى مش عارف انا عاوز اقول ايه
عارفين
والله انا لا بفكر ولا برتب الكلام الى انا بكتبه
انا سايب الكلام يطلع زى ماهو عاوز
كل دورى انى اكتب وبس
طيب
وصلنا لفين بقى ؟ بس عشان مانتوهش من بعض وكل واحد فينا يروح فى اتجاه وف الاخر محدش فينا يطلع بأى فايده من بعد التعب وتمقيق عينه فى القرايه والغلط والشتيمه فى الراجل اللى كتب الكلام الفارغ ده ؟
انا نفسى مش عارف احنا وصلنا لفين
بس انا وصلت لوحدى لنقطه مهمه اوى
اننا مش عارفين احنا عاوزين ايه
طبعا هاتقولولى : انت مين قالك تتكلم بلسان حالنا ؟
ومين أذنك عشان تقف على المنبر وتمسك المايكرفون وتتكلم بالنيابه عن الناس دى كلها ؟
طب ياجماعه انا محدش قاللى انى اتكلم بالنيابه عن حد , لكن يمكن يكون الكلام اللى انا بقوله ده متوافق مع اى حد من الناس .
يمكن يكون كلامى ده مكبوت فى صدر كتير من الناس
يمكن يكون كلامى ده حلم لبعض الناس
لكن تعرفوا … والله انا ساعات كتير بتصعب عليا نفسى وبيصعب عليا كتير من الناس
الناس اللى بتقعد تكتب وتكتب عشان توصل صوتها ( وأصوات ناس تانيه كتير بتوافقها فى الرأى) للى مفروض انهم هايسمعوا !!!!!!!!!!!!!!!!!!
ألا بالحق هو مفروض مين اللى هايسمع؟؟؟؟؟؟؟؟؟؟؟؟؟؟؟
